Uglu-bollakökur!

Image

Jæja, tími til kominn að skella einu bloggi í gang, eftir langt jólafrí og próf. Já, próf í MA eru eftir jól og byrjuðu þau núna 9. Janúar og verða flest búin á miðvikudaginn næsta. Ég var heppin þetta árið og var aðeins í 3 prófum. Þegar þau kláruðust ákváðum við bekkurinn minn, 4.T, að hittast og borða saman. Við komum nokkur með eftirrétti og ég kom með bollakökur.
Þar sem svona aðal “merki” Menntaskólans á Akureyri eru uglur, kom ekkert annað til greina en að gera uglu-bollakökur til að fagna MA-próflokum! 🙂

 Þær komu svona skemmtilega á óvart og eru einfaldar í gerð.

 Uppskriftin af þessum bollakökum er einnig venjuleg kökuuppskrift sem við heima hjá mér köllum alltaf Ellu-köku. Ella er systir afa míns og alltaf í fjölskylduboðum með henni, er Ellu-kaka gerð. Ellu-kaka er ein af uppáhalds- kökunum mínum og er sko alls ekki verri sem bollakaka. Ein uppskrift gerir ca 18-20 bollakökur.

 Hér er uppskriftin:

Bollakökurnar – innihald:

1 ½ bolli sykur
100 g smjörlíki
2 egg
1 ½ tsk vanilludropar
1 ¾ bolli hveiti
1/3 bolli kakó
1 tsk lyftiduft
1 bolli súrmjólk

Bollakökurnar – aðferð:

  1. Stillið ofninn á 180°C.
  2. Sykur og smjörlíki hrært vel saman
  3. Einu eggi bætt útí, hrært örlítið, hinu svo bætt við og hrært vel
  4. Vanilludropum bætt útí, hrært vel.
  5. Á meðan blandan er hrærð saman, setjið hveiti, kakó og lyftiduft í skál og blandið saman með skeið
  6. Bætið út í hrærivélarskálina, ásamt súrmjólkinni og blandið aðeins saman.
  7. Setjið í bollakökuform, gott að nota ísskeið, eða fulla 2/3 af forminu
  8. Bakið í 17-20 mínútur eða þar til að ef þið setjið prjón í kökuna, kemur ekkert blautt deig á prjóninn þegar þið togið hann upp J
  9. Látið kólna ( í a.m.k 30 mín)

Kremið – Innihald:

230 g púðursykur
120 g sykur
tæpir 2dl vatn
2 eggjahvítur

Kremið – aðferð:

  1. Púðursykur, sykur og vatn sett í pott og hitað þar til sykurinn er bráðnaður (tekur stutta stund)
  2. Á meðan sykurinn er að hitna, stífþeytið eggjahvíturnar.
  3. Hellið svo úr pottinum í mjórri bunu út í stífþeyttu eggjahvíturnar og láta þeytast á meðan og í smástund á eftir.
  4. Setjið kremið á með borðhníf (þarf ekki að sprauta kreminu á þegar uglurnar eru gerðar) og setjið alveg slatta.

Image

Uglu-andlit – Innihald:

3 pakkar oreo-kex (tvö augu eru tvö oreo kex)
2 pokar m&m
(hægt að nota hvaða lit sem er, þá þarf bara 1 poka, en ég vildi bara hafa uglurnar með brún augu og þá þarf 2 pakka, restina er svo bara hægt að borða! 🙂 )
1 poki Freyju möndlur

Image

Uglu-andlit – aðferð:

  • Takið í sundur eins mörg oreo kex og þið þurfið (2 kex á hverja bollaköku)
  • Setjið eitt m&m á hvert oreo kex
  • Setjið oreo-kexin hlið við hlið á miðjuna á bollakökunum.
  • Setjið 1 möndlu á milli kexanna, fyrir nef.
  • Fyrir ofan augun eru síðan gerð eyru, með því að nota borðhníf og draga kremið aðeins út til hliðanna. 🙂

Image

Verði ykkur að góðu!
-Unnur Anna

Auglýsingar

Jólasveinamöffins!

Image

Í dag kom jólablað Fréttablaðsins inn um lúguna hjá flestum Íslendingum. 🙂
Mjög fallegt blað með öllu mögulegu sem tengist jólunum. Meðal annars er ég með þessa uppskrift þar! Þar er rætt við mig um Cakes of Paradise og mínar jólahefðir. Mæli eindregið með því að þið gluggið í það! 🙂

Eins og kemur fram í blaðinu þá gerði ég þessi jólasveinamöffins fyrst árið 2011 fyrir bekkjarfélaga mína. Einföld og þægileg uppskrift sem kemur mjög krúttlega út! 🙂

Hér er uppskriftin:

Jólasveina möffins!

Möffins – Innihald:

 1 ¾ bolli hveiti
1 ½ bolli sykur
100 g smjörlíki
2 egg
1/3 bolli kakó
1 bolli súrmjólk
1 tsk natron
1 ½ tsk vanilludropar

Möffins – aðferð:

  1. Sykri og smjörlíki hrært saman
  2. Einu eggi í einu bætt út í og hrært aðeins á milli
  3. Vanilludropum bætt út í og hrært vel
  4. Þurrefnum bætt út í ásamt súrmjólkinni og blandað aðeins saman
  5. Sett í lítil (minni en þessi venjulegu) möffinsform
  6. Og bakað við 180° C  í  10 – 15 mín.

Image

Kremið – Innihald:

1 bolli síróp
4 msk sykur
2 stífþeyttar eggjahvítur

Kremið – aðferð:

  1. 1 bolla af sírópi og 4 msk af sykri sett í pott og  brætt.
  2. Á meðan blandan bráðnar eru eggjahvíturnar stífþeyttar.
  3. Sykurblöndunni er svo bættt út í eggjahvíturnar í mjórri bunu og hrært þar kremið verður þykkt
  4. Svo er kreminu sprautað á möffinsið, jarðaberi á hvolfi bætt ofan á og svo er aftur sprautað kremi til að gera dúskinn.

Image

Verði ykkur að góðu!
-Unnur Anna

Snjókorna Cupcakes!

Image

 

Sunnudagar til sælu. Sunnudagar einnig til hvíldar, fundar, lærdóms, hreingerningar, baksturs, bloggs og lesturs.
Já, stundum ætlar maður sér að gera of margt á einum degi. Dagurinn í dag er einmitt svoleiðis dagur. Ég ætlaði að gera allt að ofantöldu, en “óvart” varð lærdómur og lestur að víkja fyrir hinu. Kannski mæti ég bara með þessar cupcakes í tíma á morgun – þá yrði mér örugglega strax fyrirgefið að hafa ekki lesið mikið heima ;-).
Veturinn hefur aðeins verið að láta vita af sér á Akureyri seinustu vikuna. Það snjóaði og snjóaði, bíllinn festist svona 10 sinnum, krakkar sem og fullorðnir gerðu snjóhús og ég þurfti að moka mér leið út úr húsinu mínu.

Í tilefni af því ákvað ég að gera fínar vetrar-snjókornacupcakes. Þær eru afar fallegar og samt einfaldar í gerð.
Deigið er bara skúffukökudeig – uppskrift má finna hér. Kremið er hinsvegar nýtt – og alveg ótrúlega gott!!

 

Hér er uppskriftin

Image

 

Snjókorna-Cupcakes 

 

Deigið, eins og ég sagði áðan má finna hér. 
ATH! Í þeirri uppskrift er kakan bökuð í 30-35 mín en bollakökurnar þurfa bara ca 20 mín.
Gott að stinga prjóni í kökurnar og ef að ekkert deig festist á prjóninum þá eru þær til :).

Leyfið bollakökunum að kólna áður en þið byrjið á kreminu því það þarf að sprauta því á um leið og það er búið til. 🙂

 

Kremið – Innihald:

 

4 eggjahvítur

1 bolli sykur

¼ tsk Cream of Tartar

1 tsk vanilludropar

 

Kremið – aðferð:

 

  1. Eggjahvíturnar ásamt sykri og Cream of Tartar sett í skál sem þolir hita.
  2. Skálin síðan sett yfir pott af heitu vatni og hitað upp í 70°C og pískað allan tíman.
  3. Þegar blandan hefur náð 70°C er hún færð yfir í hrærivél og byrjað að hræra hægt og svo hraðar og hraðar og blandað þangað til kremið er orðið stíft.
  4. Þá er vanilludropum ásamt matarlit (ef þið viljið) bætt út í og hrært aðeins.
  5.  Kreminu síðan sprautað á.

 

Image

 

 

Snjókornin:

 

  • Hægt er að nota hvítt súkkulaði brætt og sprautað á smjörpappír eins og snjókorn.
  • Gott að teikna snjókornin á smjörpappírinn.
  • Setjið í frysti eða opnið glugga þannig að súkkulaðið harni og takið svo af smjörpappírnum með spaða og setjið á kökurnar. Gaman er að skreyta þær líka með litlum kúlum 🙂 . 
  • Mér finnst stundum hvíta súkkulaðið vera of gulleitt og þess vegna notaði ég núna mjallarhvítan súkkulaðihjúp, sem fæst hér á alltikoku.is

 

 

 

 

Image

 

 

Image

 

 

ImageKoma svona krúttlega út 🙂

 

 

Verði ykkur að góðu – og gleðilegan vetur! 
-Unnur Anna

 

Cupcakes með Sviss marenge kremi

Image

Þessar cupcakes heita Billy’s Vanilla Vanilla cupcakes og eru alveg fáránlega góðar! En kremið ofan á þeim, heitir Sviss-marenge krem og það er það besta sem ég hef smakkkað! Það er hægt að gera allskonar bragðtegundir úr þessu kremi en ég ætla að setja inn hér uppskrift af grunninum og þremur bragðtegundum með; Jarðaberja, lime/kókos og mokka.

Ég fékk þessa uppskrift frá systur mömmu, Auði sem er algjör cupcake snillingur! Hún er snillingur í fleiru og þið getið kíkt á síðuna hennar hér! 🙂

Svo vil ég líka benda ykkur á að hún frábæra mamma mín tekur allar fallegu myndirnar á þessari síðu, og hún er líka með blogg og þið getið kíkt á það hér 🙂

Image

Hér er svo uppskriftin af Billy’s vanilla vanilla  með Sviss marenge kremi:

Billy’s vanilla vanilla cupcakes:

Innihald:
3 bollar hveiti
2 bollar sykur
1 msk lyftiduft
3/4 tsk salt
250 gr lint smjör/smjörlíki (hef prófað bæði, mér finnst betra að hafa smjörlíki)
4 stór egg
1 bolli nýmjólk
1 tsk vanilludropar

Aðferð:

  • Hitið ofnin í 175°C
  • Hrærið saman þurrefnunum. Hrærið á litlum krafti þar til þurrefnin hafa blandast vel saman. Bætið þá linu smjörinu/smjörlíkinu út í og hrærið vel. (Verður dálítið þurrt)
  • ATH! Gott er að bæta 1 1/2 msk af kakói út í deigið í þessu skrefi, ef þið ætlið að gera mokka krem!
  • Pískið saman í öðru íláti, egg, mjólk og vanilludropa.
  • Bætið þessu svo saman við hræruna í vélinni, í þremur skömmtum. Hrærið þar til allt hefur blandast vel saman, en ekki hræra of lengi!
  • Setjið deigið í möffinsform, fyllið 2/3 af hverju formi með deigi. (ATH. mér finnst mjög gott að nota ísskeiðar til að setja í formin. Það er bæði þæginlegra en að vera með tvær venjulegar skeiðar og möffinsin verða allar jafnstórar! 🙂 )
  • Mér finnst mjög gott að vera með mini cupcake form því þau eru fullkomin stærð! Hin geta verið svolítið stór og það geta ekki allir torgað stórum cupcakes! 🙂
  • Bakið í miðjum ofni í 17 – 20 mín.
  • Látið möffinsin kólna alveg áður en kremið er sett á, svo það bráðni ekki á þeim.

Image

Sviss – marenge krem:

Innihald:
5-6 eggjahvítur
1 1/4 bolli sykur (Hægt að setja púðursykur í staðinn, t.d. ef maður er að gera mokka krem)
1 tsk vanilludropar
250 g lint smjör (Betra að hafa smjörið mjög lint, helst búið að standa á borði í nokkrar  klst)
Hægt er að setja matarlit ef á við 🙂

Aðferð:

  • Þeytið eggjahvíturnar á fullum hraða í vél
  • Setjið sykurinn út í smátt og smátt og hrærið í a.m.k 5 mín, eða þar til þær eru alveg stífar
  • Setjið vanilludropana út í og hrærið í smá stund
  • Bætið linu smjörinu smátt og smátt útí og hrærið vel á milli
  • Kremið á til að skilja sig í þessu skrefi eða verða kekkjótt, en örvæntið ekki, það þarf bara að hræra á fullu í a.m.k 10 mín og þá verður það fínt!
  • Þetta er vanillukremið. Nú ef þið mynduð vilja vanillukrem á cupcakes-in þá væri ekkert annað í stöðunni núna en að sprauta kreminu á, eða smyrja það á!

Image

  • Ef þið viljið annað bragð í kremið þá er það gert þegar kremið eins og það er núna er búið að hrærast vel í a.m.k 5 mín og þá er bragðefnið sett útí smátt og smátt
  • Þá á kremið það aftur til að skilja sig, og þá er bara að halda áfram að hræra og það mun lagast aftur!

Hér eru 3 dæmi um bragðefni:

Jarðaberja:

  • 1 box jarðaber + 2-3 msk appelsínusafi mixað ör sutt í blandara (ekki alveg í mauk þá) og bætt svo út í kremið
  • Ég ef líka prufað að setja bara nokkrar msk af jarðaberjasultu beint út í kremið og það var líka mjög gott!

Lime/kókos:

  • Limesafi + lime börkur (ca. 1 1/2 lime) + 2-3 msk kókosmjöl sett út í kremið
  • Alltaf gott að smakka kremið og bæta meiru við ef þarf!

Mokka:

  • 2-3 msk (eftir smekk) af rótsterku kaffi ásamt 1 msk af kakóki hrært saman og svo kælt sett út í kremið
  • Einnig er gott að setja nokkrar (kannski 1 msk) af söxuðum súkkulaðihúðuðum kaffibaunum út í kremið og nota svo aðeins minna saxaðar kaffibaunir sem skraut ofan á.
  • Í þessu kremi er gott að nota púðursykur í staðinn fyrir venjulegan sykur!

Image

Verði ykkur að góðu!
– Unnur Anna

Mínar uppáhalds cupcakes!

Ég á mér uppáhalds möffins. Gaman að segja frá því þá átti ég sjálf hugmyndina að uppskriftinni. Mér datt í hug í fyrrasumar að gera cupcakes úr döðluköku, setja karamellu inní og marengs ofan á. Ég ákvað að gera þetta á afmælisdaginn minn, 29. júní og fór með á Hótel Eddu, þar sem ég vann í fyrrasumar. Þetta heppnaðist svona líka vel og vildu flestir sem smökkuðu þær fá uppskrift. Ég ætlaði alltaf að senda þeim uppskrift með myndum með, en komst einhvernvegin aldrei í að gera það. Þannig hér er loksins uppskriftin, af mínum uppáhalds cupcakes, sem enn hafa ekkert nafn. Allar uppástungur vel þegnar! 😉

IMG_2166

Cupcakes – innihald:
250 gr. döðlur
1 1/2 tsk. natron
180 gr. mjúkt smjör
100 gr. sykur
3 egg
4 1/2 dl hveiti
1 tsk vanilludropar
2 tsk lyftiduft

Aðferð:
Stillið ofnin á 180°C
Döðlurnar settar í pott, vatn þannig að fljóti yfir döðlurnar.
Suða látin koma upp og þá slökkt undir og látið standa í 3 mín.
Stappa döðlurnar aðeins í pottinum. Natron sett útí.
Smjör og sykur þeytt saman í aðra skál, síðan eggin sett ofan í og þeytt vel saman við.
Þurrefnum bætt saman við.
Döðlurnar í pottinum settar útí.
Möffinsið sett í form og bakað í 20 – 25 mín.

IMG_4224

Á meðan möffinsið er í ofninum er gott að gera karamelluna.

Karamellan:
120 gr smjör
115 gr púðusykur
1/2 tsk vanilludropar
1/4 bolli rjómi

Allt sett í pott og soðið í 7-10 mínútur. Það verður að passa karamelluna vel, að hún brenni ekki. Hún á að vera vel þykk, pínu eins og glassúr.

Þegar möffinsið er tekið úr ofninum þarf að kæla það vel. Óþolinmóðir geta skellt því út í garð í smástund til að kæla það hraðar, eða inn í ískáp.
Þegar möffinsið hefur verið kælt skal taka úr hverju möffinsi lítinn „tappa“ og setja til hliðar. Geymið tappann vel því það þarf að nota hann til að loka aftur möffinsinu. Smá brauð er tekið upp úr möffinsinu.
1 – 2 tsk af karamellu er sett ofan í „holurnar“ og tappinn settur aftur á. Þannig er komin karamellufylling í möffinsið.

IMG_4247

IMG_4255

IMG_4256

Þegar því er lokið er hægt að gera ítalska marengsinn

Innihald:

250 gr. sykur
50 mL vatn
4 eggjahvítur

Aðferð:
Sjóðið sykurinn og vatnið í 117°C (þar til hann þykknar).
Þeytið eggjahvíturnar.
Hellið sykurleginum mjög rólega í langri bunu saman við þeytinguna og hrærið svo áfram í ca. 2 mínútur.

IMG_4248

Sprautið svo ítalska marengsinum á með stjörnulaga sprautu (getið gert þetta eins og þið viljið)
Stillið á grillið í ofninum og stingið kökunum með marengsinum á inn í ofn í svona 30 sekúndur – 1 mín.
ATH! Það þarf að passa vel að horfa á kökurnar inn í ofninum og taka þær út um leið og marengsinn fer aðeins að verða gullitaður, þetta gerist mjög hratt og því þarf að passa vel að marengsinn brenni ekki! 🙂

IMG_4261IMG_2065

Svo er bara að borða og njóta  – köku frá paradís 🙂
Verði ykkur að góðu!

– Unnur Anna